„მობილური ბიბლიოთეკა“-დღე მესამე

     24 აგვისტოს ზუგდიდის მუნიციპალიტეტის ცენტრალური ბიბლიოთეკის  „მობილური ბიბლიოთეკა“  ესტუმრა ენგურქაღალდკომბინატის II უბნის დასახლებაში ჯანაშიას 6-ში მცხოვრებ მოსახლეობას.

 შეხვედრის დასაწყისში ბიბლიოთეკის დირექტორმა ისაუბრა ჩვენს ბიბლიოთეკასა და ამ პროექტის მისიაზე.

შემდეგ გავედით მიმდებარე კორპუსების მოსახლეობასთან და მოვიწვიეთ ჩვენთან.

 მკითხველებმა შეარჩიეს მათთვის სასურველი წიგნები. განსაკუთრებით აქტიურობდნენ ბავშვები. 

უბნის ყველაზე პატარაც გაახარა „მობილურმა ბიბლიოთეკამ“,  რომელიც ვერ დაელოდა თავის დედიკოს და ასეთი მონდომებით შეუდგა წიგნების „შერჩევას“.

გაფორმდა 14 ახალი მკითხველი,  გაიცა 22წიგნი.

განხორციელდა ბიბლიოთეკის ახალი სერვისების დემონსტრირება, დარიგდა ბუკლეტები და ჟურნალები საჩუქრად.

ამით დასრულდა ამ პროექტის პირველი ეტაპი, რომელიც სამი დასახლების(ფაიფურის, ენგუქაღალდკომბინატისა და ე.წ. ჩაის ფაბრიკის) მოსახლეობაში გასვლებს ითვალისწინებდა. 

პროექტის მანძილზე მკითხველებს ემსახურებოდნენ სხვადასხვა განყოფილების თანამშრომლები-კ. ზვამბაია,  ი. ქარჩავა,  ნ. კოზუა,  ი. კვირკვია,  ლ.როგავა,  ბ. კაკაბაძე, ქ. ფონიავა,  ზ. მორგოშია,  მ. კუტალია.

პროექტის ტრანპორტით მომსახურება  უზრუნველყო სამშენებლო კომპანია „სანის“ უბნის უფროსმა ვალერი გვარამიამ და ამ ორგანიზაციის მიკროავტობუსით  გვემსახურებოდა  მძღოლი-დათო კუხალეიშვილი. დიდი მადლობა მათ გაწეული სამსახურისათვის!

უბნებში მოსახლეობის წინასწარი ინფორმირებისა და მათთან შეხვედრის ორგანიზაციაში გვეხმარებოდნენ ელისო ბოჭორიშვილი,  ვალია შერვაშიძე,  ლონდა მიქავა,  შალვა ღურწკაია. დიდი მადლობა მათ გაწეული სამსახურისათვის! 

გადავიღეთ სამახსოვრო ფოტოები.

პროექტის მომდევნო ეტაპზე   ზემოთაღნიშნული სამი უბნის მოსახლეობას  მოვემსახურებით პერიოდულად.

მობილური ბიბლიოთეკა-დღე მეორე

     მობილური ბიბლიოთეკა აგრძელებს თავის მუშაობას.

     16 აგვისტოს ზუგდიდის მუნიციპალიტეტის ცენტრალური ბიბლიოთეკის თანამშრომლები გასვლითი ვიზიტით იყვნენ ფაიფურის დასახლებაში, უნივერსიტეტის ქუჩის დასაწყისში.

ამ დღესაც ბიბლიოთეკამ წარმატებულად იმუშავა. გაფორმდა 20 ახალი მკითხველი და გაიცა 22 წიგნი.

    ახალგაზრდები  დიდი ინტერესით გაეცნენ  ბიბლიოთეკის ახალ სერვისებს-ვებგვერდსა და სხვა სოციალური ქსელებს, რომელთა დემონსტრირებაც ჩვეულებრივ წიგნადი ფონდის გაცემასთან ერთად მიმდინარეობდა.

მობილური ბიბლიოთეკის გასვლა მკითხველებში გაშუქდა ადგილობრივი ტელე-რადიო კომპანია „ოდიშის“ მიერ, რისთვისაც დიდ მადლობას ვუხდით მათ!

მობილური ბიბლიოთეკა

     ჩვენი ბიბლიოთეკის ახალ პროექტთა რიცხვს კიდევ ერთი ახალი  შეემატა-„მობილური ბიბლიოთეკა.“   პროექტი მიზნად ისახავს მკითხველებთან ვიზიტებს  ქალაქისგან მოშორებულ ტეროტორიებზე.
      „მობილური ბიბლიოთეკა“  ითვალისწინებს მოზარდებში წიგნისადმი ინტერესის გაღვივებას, თავისუფალი დროის მიზანმიმართულად გამოყენებას, ჯანსაღი ცხოვრების წესის პოპულარიზაციას.
     ჩვენი ბიბლიოთეკა აღნიშნულ პროექტს ახორციელებს შიდა რესურსების გამოყენებით და დღესდღეობით მხოლოდ ქალაქის ტერიტორიაზეა გასვლები დაგეგმილი.
      მობილური ბიბლიოთეკის პირველი გასვლა განხორციელდა ერისთავის N1-ში .

პროექტის სულისჩამდგმელი და ამ იდეის ავტორია ბიბლიოთეკის დირექტორი-მანანა გვარამია.

მობილურ ბიბლიოთეკას სიხარულით შეეგება აღნიშნული ქუჩის მოსახლეობა. 

განსაკუთრებით ბავშვები აქტიურობდნენ, რომელთა უმრავლესობა სტუმრად იყო ჩამოსული და მათთვის სწორედ რომ დროული და კომფორტული აღმოჩნდა ასეთი მომსახურება. 

ბიბლიოთეკარებმაც „გააღეს“  ღია ცის ქვეშ ბიბლიოთეკა და დაიწყეს დაინტერესებული მოსახლეობის მომსახურება.

 

  შეკრებილ მოსახლეობას გულთბილად მიესალმა ბიბლიოთეკის დირექტორი-მ. გვარამია და ესაუბრა ჩვენს ბიბლიოთეკაზე, თუ რა მისიით ვიყავით მათთან მისულები.
   ბიბლიოთეკის მომსახურების განყოფილებები(აბონემენტის განყოფილება, დარბაზი, ავტომატიზაციის განყოფილება,  ამერიკული კუთხე, საბავშვო განყოფილება, ბავშვთა ოთახი) რამდენიმე საათის განმავლობაში ადგილზე ემსახურებოდნენ  მკითხველებს. ძირითადად ახალი წიგნები(მეტად ძვირადღირებული და შედარებით ხელმიუწვდომელი ) იყო წარმოდგენილი.

სულ  გაიცა  30 წიგნი,  გაფორმდა  17 ახალი მკითხველი.

     მკითხველებს  დაურიგდათ   ბიბლიოთეკის ბიუკლეტები.

ჩაუტარდათ საუბარი ბიბლიოთეკის ელ-სერვისებზე, ლეპტოპის საშუალებით ნაჩვენები იქნა ბიბლიოთეკის ვებგვერდი, ბლოგები და სხვა სოციალური ქსელები, მოხდა მკითხველის კატალოგით სარგებლობის დემონსტრირება.
     დასასრულ, მკითხველებს დაურიგდათ   საჩუქრად წიგნები „შუა საუკუნეების ებრაელი პოეტები“  და  ინგლისურენოვანი ჟურნალები. ასევე  გავუმასპინძლდით ტკბილი წყლებითა და ნამცხვრებით.